Білім беру, театр және халықаралық жаңалықтар: күнделікті жаңалықтарға шолу

Қазақстанның мемлекеттік театрларында биылғы маусымда 16 мыңнан астам спектакль мен мәдени бағдарлама сахналанып, оларды 2,8 миллионнан астам көрермен тамашалады. Елдегі 59 мемлекеттік театр драма, опера, балет, музыкалық комедия және балаларға арналған қойылымдарды қамтитын жаңа премьералармен репертуарын кеңейтті. Маусым барысында 410 жаңа қойылым көрермен назарына ұсынылды. Мәдениет және ақпарат министрлігінің мәліметінше, театр инфрақұрылымын жаңғырту жұмыстары да қатар жүргізіліп жатыр.

Вьетнамға баратын қазақстандықтарға жаңа жүйе енгізілді. ҚР Сыртқы істер министрлігінің хабарлауынша, Вьетнам шетел азаматтарының елге кіру рәсімдерін жеңілдету үшін «Алдын ала ақпарат ұсыну жүйесін» (Pre-arrival Information – PAI) пилоттық режимде іске қосты. Жаңа жүйе арқылы саяхатшылар сапар алдындағы деректерін онлайн түрде алдын ала жолдай алады. Бұл әуежайдағы тексеріс пен кезектерді азайтып, шекарадан өту уақытын қысқартуға мүмкіндік береді. Жүйе қазіргі уақытта Таншоннят әуежайында жұмыс істеп тұр және кейін Нойбай, Дананг, Камрань, Фукуок сияқты әуежайларда кезең-кезеңімен енгізіледі.

Қазақстанда ЖОО-ларға құжат қабылдау 20 маусымнан басталады. Ғылым және жоғары білім министрлігінің мәліметінше, Қазақстандағы барлық жоғары оқу орындарында қабылдау комиссиялары 20 маусымнан бастап жұмысын бастайды. Осы күннен бастап талапкерлер ҰБТ нәтижесі бар жағдайда ақылы негізде оқуға түсу үшін құжат тапсыра алады. Ал мемлекеттік білім грантына үміткерлердің өтініштері 2026 жылғы 13–20 шілде аралығында қабылданады. Грант конкурсына қатысу онлайн және офлайн форматта жүзеге асады. Министрлік биылғы шекті балл талаптары өзгеріссіз қалғанын атап өтті.

Конгода Эбола вирусы өршіп тұр: 232 адам қаза тапты. Конго Демократиялық Республикасында Эбола вирусының жаңа өршуі тіркеліп, жағдай ушығып отыр. Денсаулық сақтау органдарының мәліметінше, расталған жұқтыру жағдайлары 896-ға жетіп, 232 адам көз жұмған. Аурудың ошағы елдің шығысындағы Итури және Солтүстік Киву провинцияларында анықталған. Қазіргі уақытта жүздеген науқас ауруханада оқшауланып ем қабылдап жатыр, ал мыңдаған адам вирус жұқтырғандармен байланыста болған ретінде бақылауға алынған. Бұл — Конгода тіркелген Эбола індетінің 17-ші өршуі.