Сот үкімі, әлеуметтік реформалар және спорт жаңалықтары: күнделікті жаңалықтарға шолу
Жарияланған күні:
Фото: Алматыдағы жол апатының скриншоты
Алматыдағы Әл-Фараби даңғылында үш адамның өліміне себеп болған жол апаты бойынша сот үкімі шықты. Мас күйде Zeekr көлігін басқарған Александр Пак 10 жылға бас бостандығынан және өмір бойына көлік жүргізу құқығынан айырылды. Сондай-ақ ол жәбірленуші тарапқа 10 млн теңге моральдық өтемақы төлеуге міндетті болды. Қайғылы оқиға 2026 жылғы 21 наурызда болды, жол апатында қарсы жолаққа шыққан Zeekr Mercedes көлігімен соқтығысқан еді.
28 маусымнан бастап Қазақстанда байланыс қызметтерінің жаңа ережелері күшіне енеді. Енді ақылы қызметтер абоненттің екі мәрте келісімінен кейін ғана қосылады, қоңырау «маяктарының» орнына SMS-хабарламалар жіберіледі, жарнамалық таратылымдардан бас тарту жеңілдейді. Сондай-ақ 14 жасқа дейінгі балаларға SIM-карта тек заңды өкілдің биометриялық растауымен рәсімделеді.
25 маусымнан Қазақстан колледждеріне құжат қабылдау басталады. 2026–2027 оқу жылына мемлекеттік білім беру тапсырысы аясында 140 мың орын бөлінді. Құжаттарды eGov.kz порталы арқылы немесе колледжге тікелей барып тапсыруға болады. Қабылдау мерзімі мамандыққа байланысты тамыз және қыркүйек айларына дейін жалғасады.
Талғат Байсуфинов Қазақстан құрамасының бас бапкері қызметінен кетті. Бұл жайлы Қазақстан футбол федерациясы ресми хабарлады. 57 жастағы маман ұлттық құраманы бапкерлік мансабында үш мәрте басқарды. Оның жетекшілігімен Қазақстан құрамасы 22 матч өткізіп, 5 жеңіске жетті, 7 рет тең ойнап, 10 рет жеңілді. ҚФФ Байсуфиновқа ұлттық футболдың дамуына қосқан үлесі үшін алғыс білдірді.
